ಕ್ರಿಸ್ಪಿ ಟೊಮೆಟೊ ದೋಸೆ

ಅಕ್ಕಿ (ಸಾದಾ) 2 ಕಪ್

ಟೊಮೆಟೊ 3
ಬ್ಯಾಡಗಿ ಮೆಣಸು 6
ಹುಳಿ ನೆಲ್ಲಿಕಾಯಿ ಗಾತ್ರ
ಇಂಗು 2 ಚಿಟಿಕೆ
ತೆಂಗಿನತುರಿ ಸ್ವಲ್ಪ
ಕರಿಬೇವು ಸ್ವಲ್ಪ
ರುಚಿಗೆ ತಕ್ಕಷ್ಟು ಉಪ್ಪು

ಅಕ್ಕಿಯನ್ನು ತೊಳೆದು ನೀರಿನಲ್ಲಿ 1 ಗಂಟೆ ನೆನೆಸಿಡಿ. ನಂತರ ಅಕ್ಕಿ ಜೊತೆ ಕಟ್ ಮಾಡಿದ ಟೊಮೆಟೊ, ಬ್ಯಾಡಗಿ, ಹುಳಿ ಹಾಕಿ ಚೆನ್ನಾಗಿ ಗ್ರೈಂಡ್ ಮಾಡಿ.
ಹಿಟ್ಟಿಗೆ ಉಪ್ಪು, ಸಣ್ಣಗೆ ಹೆಚ್ಚಿದ ಕರಿಬೇವು, ತೆಂಗಿನತುರಿ, ಇಂಗು ಮತ್ತು ನೀರು ಹಾಕಿ ಚೆನ್ನಾಗಿ ಕಲೆಸಿ (ಇದು ನೀರು ದೋಸೆಯ ಹಿಟ್ಟಿನಷ್ಟು ತೆಳುವಾಗಿರ ಬೇಕು). ನೀರು ದೋಸೆ/ ರವೆ ದೋಸೆಯಂತೆ ಹಿಟ್ಟನ್ನು ಕಾವಲಿ ಮೇಲೆ ಸುರಿಯಿರಿ. ದೋಸೆ ಕ್ರಿಸ್ಪ್ ಆಗಿರಲಿ. ಕಲರ್ ಫ಼ುಲ್ ದೋಸೆ ಶುಂಠಿ ಚಟ್ನಿಯೊಂದಿಗೆ ತಿನ್ನಲು ಚೆನ್ನಾಗಿರುತ್ತದೆ.

ಗ್ರೀನ್ ಬಾತ್

ಅನ್ನ  2 ಕಪ್ (ಉದುರುದುರಾಗಿರಬೇಕು)
ಸೊಪ್ಪಿನ ಪೇಸ್ಟ್ 1 ಕಪ್ (ಪುದಿನ, ಕೊತ್ತಂಬರಿ ಸೊಪ್ಪು, ಪಾಲಕ್, ದಂಟು)
ಇಂಗು 1/4
ಸಾಸಿವೆ 1/4 ಚಮಚ
ಉದ್ದು 1 ಚಮಚ
ಕಡಲೆಬೇಳೆ 2 ಚಮಚ (1 ಗಂಟೆ ಮೊದಲು ನೆನೆಸಿದ್ದು)
ಹಸಿಮೆಣಸು 4
ಒಣ ಮೆಣಸು 3 (ಬ್ಯಾಡಗಿ)
ಗೋಡಂಬಿ 6
ಎಳ್ಳಿನ ಪುಡಿ 1 ಚಮಚ (ಹುರಿದು ಪುಡಿ ಮಾಡಿದ್ದು)
ಅರಸಿನ 2 ಚಿಟಿಕೆ
ನಿಂಬೆರಸ 2 ಚಮಚ
ಎಣ್ಣ್ಗೆ 6 ಚಮಚ
ತುಪ್ಪ ಅಥವಾ ಬೆಣ್ಣೆ 1 ಚಮಚ

ಮೊದಲಿಗೆ ಅನ್ನ ಉದುರುದುರಾಗಿ ಮಾಡಿ ಇಟ್ಟುಕೊಳ್ಳಿ. ನಂತರ ಬಾಣಲೆಯಲ್ಲಿ ಎಣ್ಣೆ,  ತುಪ್ಪ ಹಾಕಿ, ಕಾದ ನಂತರ ಇದಕ್ಕೆ ಇಂಗು, ಸಾಸಿವೆ ಹಾಕಿ, ಸಾಸಿವೆ ಸಿಡಿದ ನಂತರ ಕಡಲೆಬೇಳೆ,  ಉದ್ದು, ಹಸಿಮೆಣಸು, ಒಣಮೆಣಸು, ಗೋಡಂಬಿ ಎಲ್ಲವೂ ಹಾಕಿ ಹುರಿಯಿರಿ. ನಂತರ ಚೆನ್ನಾಗಿ ತೊಳೆದು ಪೇಸ್ಟ್ ಮಾಡಿದ ಸೊಪ್ಪು ಮತ್ತು ಉಪ್ಪು ಹಾಕಿ, ಹಸಿ ವಾಸನೆ ಹೋಗುವವರೆಗೂ ಕಲೆಸಿ.  ಎಣ್ಣೆ ಮೇಲೆ ಬಂದಾಗ ಅನ್ನವನ್ನು ಹಾಕಿ ಕಲೆಸಿ, ಉರಿ ಕಡಿಮೆ ಮಾಡಿ ಇದಕ್ಕೆ ಎಳ್ಳಿನ ಪುಡಿ, ಅರಸಿನ ಹಾಕಿ ಕಲೆಸಿ ಬೆಂಕಿ ನಂದಿಸಿ, ಕೊನೆಗೆ ನಿಂಬೆರಸ ಹಾಕಿ ಕಲೆಸಿ ಬಿಸಿ ಬಿಸಿಯಾಗಿ ಬಡಿಸಿ. (ಎಲ್ಲಾ ಸೊಪ್ಪು ಸಮನಾಗಿ ತೆಗೆದುಕೊಳ್ಳಿ, ಈ ತರಹದ ಅನ್ನ ಸ್ವಲ್ಪ ಖಾರವಾಗಿ ಇದ್ದರೆ ರುಚಿ).

ಆಲೂ, ಬಸಳೆ ಕೂಟು

ಆಲೂಗಡ್ಡೆ 3
ಬಸಳೆ 1 ಕಟ್ಟು
ಈರುಳ್ಳಿ ದೊಡ್ಡದು 1
ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಹಸಿಮೆಣಸು ಉದ್ದಕ್ಕೆ ಹೆಚ್ಚಿದ್ದು 2
ಟೊಮೆಟೊ 1
ಮೆಣಸಿನ ಹುಡಿ 1 ಚಮಚ
ಅರಸಿನ 1/4 ಚಮಚ
ದನಿಯ ಹುಡಿ 1/2 ಚಮಚ
ತೆಂಗಿನಕಾಯಿ ರುಬ್ಬಿದ್ದು 1/2 ಕಪ್ (ಸ್ವಲ್ಪ ನೀರು ಹಾಕಿ ರುಬ್ಬಿ)
ಮೊಸರು 2 ಚಮಚ
ಗರಂ ಮಸಾಲ 1/4 ಚಮಚ
ಕೊತ್ತಂಬರಿ ಸೊಪ್ಪು 2 ಚಮಚ
ಎಣ್ಣೆ 4 ಚಮಚ

ಮೊದಲಿಗೆ ಆಲೂಗಡ್ಡೆ ಬೇಯಿಸಿ ಸಿಪ್ಪೆ ತೆಗೆದು ಉದ್ದಕ್ಕೆ ಕಟ್ ಮಾಡಿಟ್ಟುಕೊಳ್ಳಿ, ನಂತರ ಸೊಪ್ಪು 2, 3 ಸಲ ಶುದ್ಧ ಮಾಡಿ ಕಟ್ ಮಾಡಿಟ್ಟುಕೊಳ್ಳಿ
ಬಾಣಲೆಗೆ ಎಣ್ಣೆ ಹಾಕಿ, ಕಾದ ನಂತರ ಈರುಳ್ಳಿ ಉದ್ದಕ್ಕೆ ಹೆಚ್ಚಿದ್ದು ಹಾಕಿ, ಇದಕ್ಕೆ ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ ಹಾಕಿ,  ಹಸಿ ವಾಸನೆ ಹೋಗುವವರೆಗೆ ಕಲೆಸಿ. ಮತ್ತೆ ಇದಕ್ಕೆ ಹಸಿಮೆಣಸು, ಟೊಮೆಟೊ ಕಟ್ ಮಾಡಿದ್ದು ಹಾಕಿ, ಉಪ್ಪು ಹಾಕಿ ಕಲೆಸಿ 2 ನಿಮಿಷ ಮುಚ್ಚಿಡಿ.  ನಂತರ ಹೆಚ್ಚಿದ ಬಸಳೆ ಸೊಪ್ಪು ಹಾಕಿ ಚೆನ್ನಾಗಿ ಬೆರೆಸಿ, ಈಗ ಅರಸಿನ, ಮೆಣಸಿನ ಹುಡಿ, ದನಿಯ ಹುಡಿ ಹಾಕಿ 2 ನಿಮಿಷ ಕಲೆಸಿಡಿ. ಮತ್ತೆ ತೆಂಗಿನಕಾಯಿ ರುಬ್ಬಿದ್ದು, ಆಲೂಗಡ್ಡೆ ಕಟ್ ಮಾಡಿದ್ದು ಹಾಕಿ, ಒಮ್ಮೆ ಚೆನ್ನಾಗಿ ಕಲೆಸಿ 1 ಕಪ್ ನೀರು ಹಾಕಿ 2, 3 ನಿಮಿಷ ಕುದಿಯಲು ಬಿಡಿ. ಈಗ ಮೊಸರು (ಕಪ್ ನಲ್ಲಿ ಹಾಕಿ ಚಮಚದಿಂದ ಮಿ಼ಕ್ಸ್ ಮಾಡಿಟ್ಟದ್ದು) ಕೂಟಿಗೆ ಹಾಕಿ, ಮತ್ತೆ ಗರಂ ಮಸಾಲ, ಕೊತ್ತಂಬರಿ ಸೊಪ್ಪು ಹಾಕಿ ಕುದಿಸಿ ಇಳಿಸಿ.
(ಇದು ತುಂಬಾ ನೀರಾಗಬಾರದು) ಚಪಾತಿ, ಅನ್ನದ ಜೊತೆ ತಿನ್ನಲು ಒಳ್ಳೆಯದಾಗುತ್ತದೆ, ಬಸಳೆ ಸೊಪ್ಪು ಆರೋಗ್ಯಕ್ಕೆ ಬಹಳ ಒಳ್ಳೆಯದು.

ಹುಣಿಸೆ ಗೊಜ್ಜು

ಸಣ್ಣ (ಸಾಂಬಾರ್) ಈರುಳ್ಳಿ 10
ಎಣ್ಣೆ 2 ಚಮಚ
ಮೆಂತ್ಯೆ 1/2 ಚಮಚ
ಕರಿಬೇವು
ಟೊಮೆಟೊ 1
ಜೀರಿಗೆ ಹುಡಿ 1/2 ಚಮಚ
ಕಾಳು ಮೆಣಸಿನ ಹುಡಿ 1/2 ಚಮಚ
ಮೆಣಸಿನ ಹುಡಿ 1/2 ಚಮಚ
ದನಿಯ ಹುಡಿ 1 ಚಮಚ
ಅರಸಿನ 1/4 ಚಮಚ
ಹುಣಸೆ ಹಣ್ಣು (ಸಣ್ಣ ನಿಂಬೆಹಣ್ಣಿನ ಗಾತ್ರ)

ಈರುಳ್ಳಿ ಸಿಪ್ಪೆ ತೆಗೆದಿಟ್ಟುಕೊಳ್ಳಿ (ಕಟ್ ಮಾಡದೆ ಹಾಗೆಯೇ ಉಪಯೋಗಿಸಬೇಕು). ಹುಳಿಯನ್ನು 1 ಕಪ್ ಬಿಸಿನೀರಿನಲ್ಲಿ ಅರ್ಧ ಘಂಟೆ ಹಾಕಿಟ್ಟು ನಂತರ ರಸ ತೆಗೆದಿಟ್ಟುಕೊಳ್ಳಿ.
ಬಾಣಲೆಗೆ ಎಣ್ಣೆ ಹಾಕಿ, ಬಿಸಿಯಾದ ನಂತರ ಮೆಂತ್ಯೆ, ಕರಿಬೇವು, ಈರುಳ್ಳಿ ಹಾಕಿ ಬೆರಸಿ, ಈರುಳ್ಳಿ ಕಂದು ಬಣ್ಣ ಬರುವಾಗ ಕಟ್ ಮಾಡಿದ  ಟೊಮೆಟೊ, ಉಪ್ಪು ಹಾಕಿ ಕಲೆಸಿ, ಮತ್ತೆ ಜೀರಿಗೆ ಹುಡಿ, ಕಾಳು ಮೆಣಸು, ಮೆಣಸಿನ ಹುಡಿ, ದನಿಯ ಹುಡಿ, ಅರಸಿನ ಹಾಕಿದ ನಂತರ ಹುಳಿ ನೀರು ಹಾಕಿ, ಚೆನ್ನಾಗಿ ಕುದಿಸಿ ಇಳಿಸಿ (ಕಡಿಮೆ ಉರಿಯಲ್ಲಿ ಮಾಡಿದರೆ ಒಳ್ಳೆಯದು). ತುಂಬಾ ಗಟ್ಟಿ ಅನಿಸಿದರೆ ಸ್ವಲ್ಪ ನೀರು ಹಾಕಿ (ಇದು ತುಂಬಾ ನೀರಾಗಬಾರದು). ಬಿಸಿ ಬಿಸಿ ಅನ್ನಕ್ಕೆ ತುಪ್ಪದ ಜೊತೆ....ಆಹಾ..

ಮೆಂತ್ಯೆ ಸೊಪ್ಪಿನ ಸಾಂಬಾರು

ತೊಗರಿಬೇಳೆ 1 ಕಪ್

ಮೆಂತ್ಯೆ ಕಟ್ಟು 2

ಹಸಿಮೆಣಸು 2

ಈರುಳ್ಳಿ  2

ಟೊಮೆಟೊ 2

ಸಾಂಬಾರ್ ಹುಡಿ 2 ಚಮಚ

ಅರಸಿನ 1/4 ಚಮಚ

ತುಪ್ಪ 1 ಚಮಚ

ಎಣ್ಣೆ 2 ಚಮಚ

ಸಾಸಿವೆ 1/4 ಚಮಚ

ಕರಿಬೇವು ಸ್ವಲ್ಪ

ರುಚಿಗೆ ತಕ್ಕಷ್ಟು ಉಪ್ಪು

ಮೊದಲಿಗೆ ಬೇಳೆ ತೊಳೆದು, 2 ಕಪ್ ನೀರು ಹಾಕಿ ಕುಕ್ಕರ್ ನಲ್ಲಿ ಬೇಯಿಸಿಕೊಳ್ಳಿ. ಬೇಳೆ ಚೆನ್ನಾಗಿ ಬೆಂದಿರಬೇಕು. ಬಾಣಲೆಗೆ ಎಣ್ಣೆ, ತುಪ್ಪ ಹಾಕಿ, ಕಾದ ನಂತರ  ಸಾಸಿವೆ, ಕರಿಬೇವು, ಹಸಿಮೆಣಸು, ಉದ್ದಕ್ಕೆ ತುಂಡರಿಸಿದ ಈರುಳ್ಳಿ ಹಾಕಿ ಕಲಸಿ, ಈರುಳ್ಳಿ ಕಂದು ಬಣ್ಣ ಬಂದ ನಂತರ ಕಟ್ ಮಾಡಿದ ಟೊಮೆಟೊ, ಸ್ವಲ್ಪ ಉಪ್ಪು ಹಾಕಿ ಕಲಸಿ ಮುಚ್ಚಿಡಿ (2 ನಿಮಿಷ). ಮತ್ತೆ ಇದಕ್ಕೆ ಶುಚಿ ಮಾಡಿ ಕತ್ತರಿಸಿಟ್ಟುಕೊಂಡ ಮೆಂತ್ಯೆ ಸೊಪ್ಪು ಹಾಕಿ ಚೆನ್ನಾಗಿ ಕಲಸಿ, ಸ್ವಲ್ಪ ಬೇಯಲು ಬಿಡಿ, ಬೆಂದ ನಂತರ ಇದಕ್ಕೆ ಸಾಂಬಾರ್ ಹುಡಿ, ಅರಸಿನ ಮತ್ತು 2 ಕಪ್ ನೀರು, ಬೇಯಿಸಿದ ಬೇಳೆ ಹಾಕಿ ಕಲಸಿ 2 ನಿಮಿಷ ಕುದಿಸಿ ಇಳಿಸಿ. (ಇದು ತುಂಬಾ ನೀರು ಆಗಬಾರದು). ಇದು ಅನ್ನಕ್ಕೆ, ಚಪಾತಿಗೆ ಒಳ್ಳೆಯದಾಗುತ್ತದೆ.
ಮೆಂತ್ಯೆ ಸೊಪ್ಪು ಸಿಗದಿದ್ದರೆ ಪಾಲಕ್ ಸೊಪ್ಪು ಉಪಯೋಗಿಸಬಹುದು. 

ಪಡವಲಕಾಯಿ ಕೂಟು, ಬದನೆಕಾಯಿ ಚಟ್ನಿ

ಪಡವಲಕಾಯಿ ಕೂಟು

ಹೆಸರುಬೇಳೆ  1 ಕಪ್

ಪಡವಲಕಾಯಿ 2 ಕಪ್ (ಸಣ್ಣಗೆ ಹೆಚ್ಚಿದ್ದು)

ಟೊಮೆಟೊ 1 (ಸಣ್ಣಗೆ ಹೆಚ್ಚಿದ್ದು)

ಈರುಳ್ಳಿ 1  (ಸಣ್ಣಕ್ಕೆ ಹೆಚ್ಚಿದ್ದು)

ಹಸಿಮೆಣಸು 2 (ಉದ್ದಕ್ಕೆ ಹೆಚ್ಚಿದ್ದು)

ಶುಂಠಿ 2 ಇಂಚು (ಉದ್ದಕ್ಕೆ ಹೆಚ್ಚಿದ್ದು)

ಮೆಣಸಿನ ಹುಡಿ 1 ಚಮಚ

ಧನಿಯ ಪುಡಿ 2 ಚಮಚ

ಅರಸಿನ 1/4 ಚಮಚ

ಎಣ್ಣೆ 2 ಚಮಚ

ಉಪ್ಪು ರುಚಿಗೆ ತಕ್ಕಷ್ಟು

ಕರಿಬೇವು ಸ್ವಲ್ಪ

ಕೊತ್ತಂಬರಿ ಸೊಪ್ಪು ಸ್ವಲ್ಪ

ತೆಂಗಿನ ತುರಿ ಸ್ವಲ್ಪ

ಹೆಸರುಬೇಳೆ ಶುದ್ಧ ಮಾಡಿ 2 ಕಪ್ ನೀರು ಹಾಕಿ ಪಾತ್ರೆಯಲ್ಲಿ ಬೇಯಲು ಇಡಿ. ಪಡವಲಕಾಯಿ ಅರ್ಧ ಇಂಚು ಉದ್ದಕ್ಕೆ ಕತ್ತರಿಸಿ ಬೇಳೆಯಲ್ಲಿ ಹಾಕಿ, ಇದರಲ್ಲಿ ಅರಸಿನ, ಉಪ್ಪು ಹಾಕಿ, ಬೆಂದ ನಂತರ ಬೆಂಕಿ ನಂದಿಸಿ. ಮತ್ತೊಂದು ಬಾಣಲೆಯಲ್ಲಿ ಎಣ್ಣೆ, ಸಾಸಿವೆ, ಹಸಿಮೆಣಸು, ಹಸಿಶುಂಠಿ, ಕರಿಬೇವು, ಈರುಳ್ಳಿ ಹಾಕಿ fry ಮಾಡಿ, ನಂತರ ಟೊಮೆಟೊ ಹಾಕಿ ಚೆನ್ನಾಗಿ ಕಲಸಿ, ಉಪ್ಪು ಹಾಕಿ 2 ನಿಮಿಷ ಮುಚ್ಚಿಡಿ. ನಂತರ ಮೆಣಸಿನ ಹುಡಿ, ಧನಿಯ ಹುಡಿ ಹಾಕಿ. ಈಗ ಬೆಂದ ಹೆಸರುಬೇಳೆ, ಪಡವಲಕಾಯಿಯನ್ನು ತೆಗೆದು (ನೀರಿಲ್ಲದೆ) ಒಗ್ಗರಣೆ ಪಾತ್ರೆಗೆ ಹಾಕಿ 2 ನಿಮಿಷ ಕಲಸಿ. ಕೊನೆಗೆ ಹೆಸರುಬೇಳೆ ಬೇಯಿಸಿದ ನೀರು ಹಾಕಿ ಒಮ್ಮೆ ಕುದಿಸಿ, ಕೊತ್ತಂಬರಿ ಸೊಪ್ಪು, ತೆಂಗಿನ ತುರಿ ಹಾಕಿ ಕಲಸಿ ಇಳಿಸಿ.

ಚಪಾತಿಗೆ, ಅನ್ನಕ್ಕೆ ಚೆನ್ನಾಗಿರುತ್ತದೆ.

ಬದನೆಕಾಯಿ ಚಟ್ನಿ 

ಬದನೆ 1 (ಉದ್ದದ ಹಸಿರು)

ಸಣ್ಣ ಈರುಳ್ಳಿ 5

ಟೊಮೆಟೊ 1

ಹಸಿಮೆಣಸು 2

ಕರಿಬೇವು ಸ್ವಲ್ಪ

ಕೊತ್ತಂಬರಿ ಸೊಪ್ಪು ಸ್ವಲ್ಪ

ಉದ್ದಿನಬೇಳೆ 1/4 ಚಮಚ

ಸಾಸಿವೆ 1/4 ಚಮಚ

ಎಣ್ಣೆ 2 ಚಮಚ

ಬೆಲ್ಲ ಚೂರು

ಮೊದಲಿಗೆ ಪಾತ್ರೆಯಲ್ಲಿ 1 ಕಪ್ ನೀರು ಹಾಕಿ, ಇದರಲ್ಲಿ ಕತ್ತರಿಸಿದ ಬದನೆಕಾಯಿ, ಶುದ್ಧ ಮಾಡಿದ ಈರುಳ್ಳಿ, 2 ಭಾಗ ಮಾಡಿದ ಟೊಮೆಟೊ, ಹಸಿಮೆಣಸು ಹಾಕಿ 5 ನಿಮಿಷ ಬೇಯಿಸಿ, ಬೆಂಕಿ ನಂದಿಸಿ, ತಣಿಸಿ. ತಣಿದ ನಂತರ ಟೊಮೆಟೊ ಸಿಪ್ಪೆ ತೆಗೆದು, ಎಲ್ಲವನ್ನು ನೀರಿಲ್ಲದೆ ಮಿಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ.  Pan ನಲ್ಲಿ ಉದ್ದು, ಕರಿಬೇವು fry ಮಾಡಿ. ಈಗ ಇದಕ್ಕೆ ರುಬ್ಬಿದ್ದನ್ನು ಮತ್ತು ತರಕಾರಿ ಬೇಯಿಸಿ ಉಳಿದ ನೀರು ಹಾಕಿ, ಮತ್ತೆ ಉಪ್ಪು, ಬೆಲ್ಲ ಹಾಕಿ ಕುದಿಸಿ, ಕೊನೆಗೆ ಕೊತ್ತಂಬರಿ ಸೊಪ್ಪು ಹಾಕಿ ಇಳಿಸಿ.

ಇದು ಇಡ್ಲಿಗೆ, ದೋಸೆಗೆ, ಅನ್ನಕ್ಕೆ ಚೆನ್ನಾಗಿರುತ್ತದೆ.

ಬದನೆ ಎಣ್ಣೆಗಾಯಿ, ಸಿಂಪ್ಲ್ ದಾಲ್

ಬದನೆ ಎಣ್ಣೆಗಾಯಿ

ಸಣ್ಣ  ಗುಂಡು ಬದನೆ 4

ತೆಂಗಿನತುರಿ 1 ಕಪ್

ಈರುಳ್ಳಿ ದೊಡ್ಡದು 1

ಟೊಮೆಟೊ 1

ಹಸಿಮೆಣಸು 2

ಹುಣಿಸೆಹಣ್ಣಿನ ರಸ 2 ಚಮಚ

ಮೆಣಸಿನ ಹುಡಿ 1 ಚಮಚ

ಅರಸಿನ ಹುಡಿ 1/4 ಚಮಚ

ಧನಿಯ ಹುಡಿ 1 ಚಮಚ

ಶುಂಠಿ 1 ಇಂಚು

(ಬೇಕಾದರೆ ಬೆಳ್ಳುಳ್ಳಿ 2 ಎಸಳು)

ಎಣ್ಣೆ 6 ಚಮಚ

ಸಾಸಿವೆ 1/4 ಚಮಚ

ಗೋಡಂಬಿ 4

ರುಚಿಗೆ ತಕ್ಕಷ್ಟು ಉಪ್ಪು

ಮೊದಲಿಗೆ ಸ್ಟೌವ್ ಹಚ್ಚಿ ಬಾಣಲೆಯಲ್ಲಿ 2 ಚಮಚ ಎಣ್ಣೆ ಹಾಕಿಡಿ, ಇದು ಕಾದ ನಂತರ ಹಸಿಮೆಣಸು, ಹೆಚ್ಚಿದ ಈರುಳ್ಳಿ, ಶುಂಠಿ (ಬೇಕಾದರೆ ಬೆಳ್ಳುಳ್ಳಿ) ಹಾಕಿ ಹುರಿಯಿರಿ. ಮತ್ತೆ ಇದಕ್ಕೆ ತೆಂಗಿನತುರಿ, ಟೊಮೆಟೊ ಹಾಕಿ ಸ್ವಲ್ಪ ಹುರಿಯಿರಿ. ಈಗ ತಣಿಯಲು ಬಿಡಿ. ನಂತರ ಹುರಿದಿಟ್ಟ ಸಾಮಾಗ್ರಿಯ ಜೊತೆಗೆ ಹುಣಿಸೆ ರಸ, ಮೆಣಸಿನ ಹುಡಿ, ಅರಸಿನ, ಧನಿಯ ಹುಡಿ, ಉಪ್ಪು, ಗೋಡಂಬಿ ಎಲ್ಲವನ್ನು ಮಿಕ್ಸಿಗೆ ಹಾಕಿ ನುಣ್ಣಗೆ, ಗಟ್ಟಿಯಾಗಿ ರುಬ್ಬಿಕೊಳ್ಳಿ (ಬೇಕಾದಲ್ಲಿ ಚೂರು ನೀರು ಹಾಕಿ). ಬದನೆಕಾಯಿಗಳನ್ನು

ಮುಕ್ಕಾಲು ಅಂಶದವರೆಗೆ ನಾಲ್ಕು ಭಾಗ ಸೀಳಿ, ಅದರಲ್ಲಿ ರುಬ್ಬಿದ ಮಸಾಲೆ ತುಂಬಿಸಿಟ್ಟುಕೊಳ್ಳಿ. ಮತ್ತೆ ನಾನ್ ಸ್ಟಿಕ್ ಪಾತ್ರೆಯಲ್ಲಿ 4 ಚಮಚ ಎಣ್ಣೆ ಹಾಕಿರಿ, ಕಾದ ನಂತರ ಸಾಸಿವೆ ಹಾಕಿ ಸಿಡಿಸಿ, ನಂತರ ಮಸಾಲೆ ತುಂಬಿಸಿಟ್ಟಿದ್ದ ಬದನೆಕಾಯಿಯನ್ನು ಮೆಲ್ಲಗೆ ಎಣ್ಣೆಗೆ ಹಾಕಿ ಮುಚ್ಚಿಡಿ, ಕಡಿಮೆ ಬೆಂಕಿಯಲ್ಲಿ 5 ನಿಮಿಷ ಬೇಯಿಸಿ. ಮತ್ತೆ ಸ್ವಲ್ಪ (2-3 ಚಮಚ) ನೀರು ಹಾಕಿ ಮುಚ್ಚಿಡಿ, ಮತ್ತೆ 3 ನಿಮಿಷ ಬೇಯಿಸಿ, ಈಗ ಉಳಿದ ಮಸಾಲೆಯನ್ನು ಪ್ಯಾನ್ ಗೆ ಹಾಕಿ ಮೀಡಿಯಂ ಬೆಂಕಿಯಲ್ಲಿ ಬೇಯಿಸಿ, 1 ಕಪ್ ನೀರು ಹಾಕಿ, ಕಲಸಿ. ಆನಂತರ ಕುದಿಸಿ, ಇಳಿಸಿ.

ಎಣ್ಣೆಗಾಯಿ ಸ್ವಲ್ಪ ಗಟ್ಟಿಯಾಗಿರಬೇಕು, ಬಿಸಿ ಅನ್ನಕ್ಕೆ, ಚಪಾತಿಗೆ fantastic!! (ಹೆಸರೇ ಹೇಳುವ ಹಾಗೆ ಎಣ್ಣೆಗಾಯಿ ಅಂದರೆ, ಸ್ವಲ್ಪ ಎಣ್ಣೆ ಹೆಚ್ಚು ಹಾಕಿದರೇ ಚೆನ್ನ)

ಸಿಂಪ್ಲ್ ದಾಲ್

ತೊಗರಿಬೇಳೆ 1 ಕಪ್

ಟೊಮೆಟೊ 2 (ಸಣ್ಣಕ್ಕೆ ಹೆಚ್ಚಿಕೊಳ್ಳಿ)

ಹಸಿಮೆಣಸು 3 (ಉದ್ದಕ್ಕೆ ಹೆಚ್ಚಿಕೊಳ್ಳಿ)

ಕರಿಬೇವು ಸ್ವಲ್ಪ

ಕೊತ್ತಂಬರಿ ಸೊಪ್ಪು ಸ್ವಲ್ಪ

ಜೀರಿಗೆ 1/2 ಚಮಚ

ಶುಂಠಿ 1 ಇಂಚು (ಪೇಸ್ಟ್ ಅಥವಾ ಜಜ್ಜಿದ್ದು)

(ಬೇಕಾದರೆ ಬೆಳ್ಳುಳ್ಳಿ 2 ಜಜ್ಜಿದ್ದು ಅಥವಾ ಪೇಸ್ಟ್)

ಅರಸಿನ 1/4 ಚಮಚ

ಉಪ್ಪು ರುಚಿಗೆ ತಕ್ಕಷ್ಟು

ಎಣ್ಣೆ  1 ಚಮಚ

ತುಪ್ಪ 1 ಚಮಚ

ಮೊದಲಿಗೆ ಬೇಳೆಯನ್ನು 2 ಕಪ್ ನೀರು ಹಾಕಿ ಕುಕ್ಕರ್ ನಲ್ಲಿ ಚೆನ್ನಾಗಿ ಬೇಯಿಸಿಕೊಳ್ಳಿ. ಬೇಳೆ ಬೆಂದ ನಂತರ ಪೇಸ್ಟ್ ತರಹ ಇರಬೇಕು, ಪ್ಯಾನ್ ನಲ್ಲಿ ಎಣ್ಣೆ, ತುಪ್ಪ ಹಾಕಿ ಕಾದ ನಂತರ ಸಾಸಿವೆ, ಹಸಿಮೆಣಸು, ಜೀರಿಗೆ, ಕರಿಬೇವು, ಶುಂಠಿ (ಬೇಕಾದರೆ ಬೆಳ್ಳುಳ್ಳಿ) ಹಾಕಿ ಹುರಿಯಿರಿ, ನಂತರ ಟೊಮೆಟೊ, ಉಪ್ಪು, ಅರಸಿನ ಹಾಕಿ ಚೆನ್ನಾಗಿ ಕಲಸಿ 3 ನಿಮಿಷ ಮುಚ್ಚಿಡಿ. ನಂತರ ಬೇಯಿಸಿಟ್ಟುಕೊಂಡ ಬೇಳೆ ಹಾಕಿ ಚೆನ್ನಾಗಿ ಕಲಸಿ (ತುಂಬಾ ಗಟ್ಟಿ ಅನಿಸಿದರೆ ಸ್ವಲ್ಪ ನೀರು ಹಾಕಬಹುದು). ನಂತರ ಕೊತ್ತಂಬರಿ ಸೊಪ್ಪು ಹಾಕಿ 2 ನಿಮಿಷ ಕುದಿಸಿ ಇಳಿಸಿ.

(ದಾಲ್ ತುಂಬಾ ನೀರಾಗಬಾರದು, ಅನ್ನಕ್ಕೆ, ಚಪಾತಿಗೆ, ದೋಸೆಗೆ ಚೆನ್ನಾಗಿರುತ್ತದೆ, ಒಗ್ಗರಣೆ ಮೀಡಿಯಂ ಬೆಂಕಿಯಲ್ಲಿ  ಮಾಡಿದರೆ ಒಳ್ಳೆಯದು)

ಗಾರ್ಗಿ, ರಿಬ್ಬನ್ ಪಕೋಡ

ಗಾರ್ಗಿ

ಬೆಲ್ಲ 1 ಕಪ್

ನೀರು 1-1/4 ಕಪ್

ಗೋದಿ ಹುಡಿ 1 ಕಪ್

ಕರಿಯಲು ತುಪ್ಪ/ಎಣ್ಣೆ

ಏಲಕ್ಕಿ ಪುಡಿ

ಅಡುಗೆ ಸೋಡ 2 ಚಿಟಿಕೆ

ಗಸಗಸೆ 1 ಚಮಚ

ಗೋಡಂಬಿ 6 

ತೆಂಗಿನತುರಿ 4 ಚಮಚ

 

ಮೊದಲಿಗೆ ನೀರು ಬಿಸಿಗೆ ಇಟ್ಟು ಅದರಲ್ಲಿ ಬೆಲ್ಲ ಹಾಕಿ ಕರಗಿಸಿ, ನಂತರ ಸೋಸಿ. ಬಿಸಿ ಇರುವಾಗಲೇ ಗೋದಿ ಹುಡಿ ಹಾಕಿ ಕಲಸಿ. ಇದನ್ನು ಬೋಂಡ ಹಿಟ್ಟಿನ ಹದಕ್ಕೆ ಕಲಸಿ, 2 ಗಂಟೆ ನೆನೆಯಲು ಬಿಡಿ.  ನಂತರ ಇದರಲ್ಲಿ ಗಸಗಸೆ, ಸೋಡ, ಏಲಕ್ಕಿ, ತುಂಡರಿಸಿದ ಗೋಡಂಬಿ, ತೆಂಗಿನ ತುರಿ ಹಾಕಿ ಕಲಸಿ, ಮತ್ತೆ ಬೋಂಡ ತರಹ ಎಣ್ಣೆಯಲ್ಲಿ ಕರಿಯಿರಿ. ಗಾರ್ಗಿ ಕಂದು ಬಣ್ಣಕ್ಕೆ ತಿರುಗಿದಾಗ ಎಣ್ಣೆಯಿಂದ ತೆಗೆಯಿರಿ. ತಣಿದ ನಂತರ ತಿನ್ನಲು ಬಲು ರುಚಿ. ಸುಲಭವಾಗಿ ಮಾಡಬಹುದಾದ ಸಿಹಿ ತಿಂಡಿ.

(ಗಾರ್ಗಿ ತುಪ್ಪದಲ್ಲೇ ಮಾಡಬಹುದು ಅಥವಾ ಎಣ್ಣೆಯಲ್ಲಿ 2 ಚಮಚ ತುಪ್ಪ ಹಾಕಿ ಕರಿಯಿರಿ. ಸ್ವಲ್ಪ ನೀರು ಹೆಚ್ಚು ಅನಿಸಿದರೆ ಇನ್ನೂ ಸ್ವಲ್ಪ ಗೋದಿ ಹುಡಿ ಹಾಕಿ ಕಲಸಿ)

ರಿಬ್ಬನ್ ಪಕೋಡ

ಅಕ್ಕಿ ಹುಡಿ 1 ಕಪ್

ಕಡಲೆಹಿಟ್ಟು 1 ಕಪ್

ಬೆಣ್ಣೆ 2 ಚಮಚ

ಮೆಣಸಿನ ಹುಡಿ 2 ಚಮಚ

ಕರಿಯಲು ಎಣ್ಣೆ

ಬಿಸಿ ಎಣ್ಣೆ 1/4  ಸೌಟು

ಇಂಗು 1/4 ಚಮಚ

ರುಚಿಗೆ ತಕ್ಕಷ್ಟು ಉಪ್ಪು

ಒಂದು ಪಾತ್ರೆಯಲ್ಲಿ ಎಣ್ಣೆ ಹೊರತು ಎಲ್ಲವನ್ನು ಹಾಕಿ ಕಲಸಿಕೊಳ್ಳಿ,  ಮತ್ತೆ 1/4 ಸೌಟು ಎಣ್ಣೆ ಬಿಸಿ ಮಾಡಿ ಹಾಕಿ ಚೆನ್ನಾಗಿ ಕಲಸಿ. ನೀರು ಸ್ವಲ್ಪ ಸ್ವಲ್ಪ ಹಾಕಿ, ಚಕ್ಕುಲಿಯ ಅಚ್ಚಿನಲ್ಲಿ ಹಾಕಿ ಸುಲಭವಾಗಿ ಒತ್ತಲಿಕ್ಕೆ ಬರುವ ಹಾಗೆ  ಕಲಸಿ. ಈ ಮಿಶ್ರಣ ತುಂಬಾ ಗಟ್ಟಿ ಇರಬಾರದು, ತುಂಬಾ ನೀರೂ ಇರಬಾರದು,

ಈಗ ಎಣ್ಣೆಯನ್ನು ಬಾಣಲೆಯಲ್ಲಿ ಕಾಯಲು ಇಟ್ಟು, ಕಾದ ಎಣ್ಣೆಗೆ ಚಕ್ಕುಲಿ ಅಚ್ಚಿನಿಂದ ಡೈರೆಕ್ಟ್ ಆಗಿ ಹಿಟ್ಟು ಒತ್ತಿ. ಚೆನ್ನಾಗಿ ಕರಿದ ನಂತರ ಎಣ್ಣೆಯಿಂದ ತೆಗೆಯಿರಿ.

ಹಿಟ್ಟು ಕಲೆಸಿದ ಕೂಡಲೇ ಮಾಡಬೇಕು. (ಚಕ್ಕುಲಿ ಅಚ್ಚಿನಲ್ಲಿ 5 ಬಿಲ್ಲೆಗಳಿರುತ್ತದೆ, 2 ಉದ್ದ ಲೈನ್ ಇರುವ ಬಿಲ್ಲೆಯನ್ನು ಉಪಯೋಗಿಸಿ)

ರಿಬ್ಬನ್ ಪಕೋಡ ಒಂದು ವಾರಕ್ಕೆ ಇಟ್ಟು ತಿನ್ನಬಹುದು. ಇದು ಒಳ್ಳೆ ಟೈಂ ಪಾಸ್ ಐಟಂ.

ರೊಟ್ಟಿಗಳು - ಎರಡು ವಿಧ

ಕ್ಯಾಪ್ಸಿಕಂ ರೊಟ್ಟಿ

ಅಕ್ಕಿ ಹುಡಿ 1 ಕಪ್

ಕ್ಯಾಪ್ಸಿಕಂ 1

ಹಸಿಮೆಣಸು 2 (ಸಣ್ಣಗೆ ಹೆಚ್ಚಿಕೊಳ್ಳಿ)

ಕರಿಬೇವು ಸ್ವಲ್ಪ

ತೆಂಗಿನತುರಿ 1/4 ಕಪ್

ಮೈದ 4 ಚಮಚ

ರುಚಿಗೆ ತಕ್ಕಷ್ಟು ಉಪ್ಪು

ಮೊದಲಿಗೆ ಒಂದು ಪಾತ್ರೆಯಲ್ಲಿ ಸಣ್ಣಗೆ ಹೆಚ್ಚಿದ ಕ್ಯಾಪ್ಸಿಕಂ ಹಾಕಿ, ನಂತರ ಮೇಲೆ ಹೇಳಿದ ಎಲ್ಲಾ ಪದಾರ್ಥಗಳನ್ನು ಹಾಕಿಕೊಳ್ಳಿ, ಮತ್ತೆ ಬೆಚ್ಚಗಿನ ನೀರು ಹಾಕಿ ಚೆನ್ನಾಗಿ ಕಲೆಸಿ,  ತುಂಬಾ ಗಟ್ಟಿ ಇರಬಾರದು, ಕೈಯಲ್ಲಿ ಸುಲಭವಾಗಿ ತಟ್ಟುವಂತಿರಬೇಕು. ನಾನ್ ಸ್ಟಿಕ್  ತವದಲ್ಲಿ ಒಂದು ಚಮಚ ಎಣ್ಣೆ ಸವರಿ, ದೊಡ್ಡ ನಿಂಬೆಹಣ್ಣಿನ ಗಾತ್ರದ  ಉಂಡೆ ತೆಗೆದು ಎಷ್ಟು ಬೇಕೋ ಅಷ್ಟು ತೆಳ್ಳಗೆ ತಟ್ಟಿ ಮತ್ತೆ ಸ್ಟೌವ್ ಹಚ್ಚಿ, ತವ ಅದರ ಮೇಲೆ ಇಟ್ಟು, ರೊಟ್ಟಿಯ ಮೇಲೆ ಒಂದು ಮುಚ್ಚಳ ಮುಚ್ಚಿ, ಮೀಡಿಯಂ ಬೆಂಕಿಯಲ್ಲಿ ಬೇಯಿಸಿ. ಬೇಯುವಾಗ 1 ಚಮಚ ಬೆಣ್ಣೆ ಸವರಿ ತಿರುವಿ ಹಾಕಿ, ಹಾಗೆ ಎರಡು ಕಡೆ ಬೇಯಿಸಿ. ಶುಂಠಿ ಚಟ್ನಿ ಜೊತೆ ತಿನ್ನಲು ರುಚಿ. (ರೊಟ್ಟಿ ಯಾವಾಗಲೂ ತವ ತಣ್ಣಗೆ ಮಾಡಿ ತಟ್ಟಬೇಕು, ಸಾಮಾನ್ಯವಾಗಿ ರೊಟ್ಟಿ ಮಾಡುವಾಗ  2 ತವ ಉಪಯೋಗಿಸಿ ಮಾಡಿದರೆ ಒಳ್ಳೆಯದು)

 ಕಾಯಿ - ಶುಂಠಿ ಚಟ್ನಿ

ಕಾಯಿ ತುರಿ 1 ಕಪ್

ಹಸಿಮೆಣಸು 3

ಶುಂಠಿ 1 ಇಂಚು

ರುಚಿಗೆ ತಕ್ಕಷ್ಟು ಉಪ್ಪು

ಒಂದು ಚಮಚ ಎಣ್ಣೆ ಬಿಸಿ ಮಾಡಿ ಹಸಿಮೆಣಸು ಹುರಿದು ಮಿಕ್ಸಿಗೆ ಹಾಕಿ, ಇದರೊಟ್ಟಿಗೆ  ಮೇಲೆ ಹೇಳಿದ ಎಲ್ಲಾ ಪದಾರ್ಥಗಳನ್ನು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಇದಕ್ಕೆ ಒಗ್ಗರಣೆ - ಎಣ್ಣೆ, ಸಾಸಿವೆ, ಕರಿಬೇವು, 1/4 ಚಮಚ ಉದ್ದು ಹುರಿದು ಚಟ್ನಿಗೆ ಹಾಕಿ ಕಲೆಸಿ, ನಂತರ 1/4 ಚಮಚ ನಿಂಬೆರಸ ಹಿಂಡಿ ಕಲೆಸಿ,

ಬೆಂಗಳೂರು ಅಕ್ಕಿ ರೊಟ್ಟಿ

ಅಕ್ಕಿ ಹುಡಿ 1 ಕಪ್

ಈರುಳ್ಳಿ 1/2 ಕಪ್ (ಸಣ್ಣಗೆ ಹೆಚ್ಚಿದ್ದು)

ಹಸಿಮೆಣಸು 3 (ಸಣ್ಣಗೆ ಹೆಚ್ಚಿದ್ದು)

ಕರಿಬೇವು ಸಣ್ಣಗೆ ಹೆಚ್ಚಿದ್ದು ಸ್ವಲ್ಪ

ಜೀರಿಗೆ 1/4 ಚಮಚ

ತೆಂಗಿನತುರಿ 1/4 ಕಪ್

ಅನ್ನದ ಪೇಸ್ಟ್ 4 ಚಮಚ ಅಥವಾ 4 ಚಮಚ ಮೈದ

ರುಚಿಗೆ ತಕ್ಕಷ್ಟು ಉಪ್ಪು

ಒಂದು ಪಾತ್ರೆಯಲ್ಲಿ ಎಲ್ಲವನ್ನು ಹಾಕಿ ಸ್ವಲ್ಪ ಸ್ವಲ್ಪ ಬೆಚ್ಚಗಿನ ನೀರು ಹಾಕಿ ಕಲಸಿ, ತಟ್ಟಲು ಸುಲಭವಾಗುವ ಹಾಗೆ ಮಾಡಿಕೊಳ್ಳಿ. ತವಕ್ಕೆ ಎಣ್ಣೆ ಸವರಿ ತೆಳ್ಳಗೆ ತಟ್ಟಿ ಬೆಂಕಿಯ ಮೇಲಿಡಿ. ಮತ್ತೆ ಸ್ವಲ್ಪ ತುಪ್ಪ ಅಥವಾ ಬೆಣ್ಣೆ ಹಾಕಿ ಎರಡೂ ಕಡೆ ಚೆನ್ನಾಗಿ ಬೇಯಿಸಿ. ಅಕ್ಕಿ ರೊಟ್ಟಿ ರೆಡಿ. ಇದು ಹಾಗೆಯೇ ತಿನ್ನಬಹುದು ಅಥವಾ ನಿಂಬೆಹಣ್ಣಿನ ಉಪ್ಪಿನಕಾಯಿ ಒಟ್ಟಿಗೆ ಸಹ ತಿನ್ನಲು ರುಚಿ.

ಡೇಟ್ಸ್ ಮತ್ತು ನಟ್ಸ್ ರೋಲ್

ಡೇಟ್ಸ್ 1/2 ಕೆಜಿ

ಗೋಡಂಬಿ 15

ಬಾದಾಮಿ 15

ಏಲಕ್ಕಿ 6 (ಪುಡಿ ಮಾಡಿ)

ತುಪ್ಪ 10 ಚಮಚ

ಬ್ರೆಡ್ ಕ್ರಮ್ಸ್ (ಬ್ರೆಡ್ ಸ್ಲೈಸ್ ತವದಲ್ಲಿ ಬಿಸಿಮಾಡಿ ಪುಡಿ ಮಾಡಿಟ್ಟುಕ್ಕೊಳ್ಳಿ)

ಮೊದಲಿಗೆ ಡೇಟ್ಸ್  ಬೀಜ ತೆಗೆದು ಶುದ್ಧ ಮಾಡಿಟ್ಟುಕೊಳ್ಳಿ. Non-stick ಪಾತ್ರೆಯಲ್ಲಿ ತುಪ್ಪ ಬಿಸಿ ಮಾಡಿ, ಇದರಲ್ಲಿ ಗೋಡಂಬಿ, ಬಾದಾಮಿ ಬೇರೆ ಬೇರೆಯಾಗಿ, ಕಪ್ಪಾಗದ ಹಾಗೆ ಹುರಿದು ತೆಗೆಯಿರಿ, ಇದೇ ತುಪ್ಪಕ್ಕೆ ಡೇಟ್ಸ್ ಹಾಕಿ ನಿಧಾನವಾಗಿ ಕಲೆಸಿ. ಮರದ ಸೌಟಿನಲ್ಲಿ ಒತ್ತಿ ಒತ್ತಿ ಮೀಡಿಯಂ ಬೆಂಕಿಯಲ್ಲಿ ಕಲಸಿ. ಡೇಟ್ಸ್ ಮುದ್ದೆ ತರಹ ಆಗುತ್ತೆ, ಸ್ಟೌವ್ ಆಫ್ ಮಾಡಿ. ನಂತರ ಇದಕ್ಕೆ ಹುರಿದ ನಟ್ಸ್, ಏಲಕ್ಕಿ ಪುಡಿ ಹಾಕಿ ಒಂದಕ್ಕೊಂದು ಅಂಟಿಕ್ಕೊಳ್ಳುವವರೆಗೂ  ಚೆನ್ನಾಗಿ ಕಲಸಿ. ನಂತರ ಇದನ್ನು ತಟ್ಟೆಗೆ ಹಾಕಿ ರೋಲ್ ಮಾಡಿ, ಈ ರೋಲನ್ನು ಬ್ರೆಡ್ ಕ್ರಮ್ಸ್ ನಲ್ಲಿ ಉರುಳಿಸಿ freezer ನಲ್ಲಿ 1/2 ಘಂಟೆ ಇಟ್ಟು, ತೆಗೆದು 1/2 ಇಂಚು ದಪ್ಪಕ್ಕೆ ರೌಂಡಾಗಿ ಕತ್ತರಿಸಿ.  ಸರಿಯಾಗಿ ಕತ್ತರಿಸಲು ಬಾರದಿದ್ದರೆ ಇನ್ನೂ ಸ್ವಲ್ಪ ಹೊತ್ತು freezer ನಲ್ಲಿಟ್ಟು  ಗಟ್ಟಿಯಾದ ನಂತರ ಕತ್ತರಿಸಿ, ತುಂಡುಗಳನ್ನ ಸವಿಯಿರಿ, ತುಂಬಾ ರುಚಿಕರವಾಗಿರುತ್ತದೆ. ಅಗತ್ಯವಿರುವಸ್ಟು   ತುಂಡು ಮಾಡಿಕೊಂಡು ಉಳಿದದ್ದನ್ನು ಪುನ: ಫ್ರಿಡ್ಜ್ ನಲ್ಲಿಡಿ.

ಇದರಲ್ಲಿ ಸಕ್ಕರೆ ಇಲ್ಲ, ನೀರು ಇಲ್ಲ, ಮಾಡಲು ತುಂಬಾ ಸುಲಭ. ಸವಿಯಲು fantastic!

ಒಮ್ಮೆ ಪ್ರಯತ್ನಿಸಿ.

ವಿ.ಸೂ: ತುಪ್ಪ 2 ಚಮಚ ಹೆಚ್ಚುಕಮ್ಮಿ ಮಾಡಿಕೊಳ್ಳಬಹುದು; ಡೇಟ್ಸ್ ಸ್ವಲ್ಪ soft ಇರುವುದು ತೆಗೆದುಕೊಳ್ಳಿ, ತುಂಬಾ ಕ್ರಯದ್ದು ಬೇಡ.

ಅಲೂ ಮತ್ತು ಬದನೆಕಾಯಿ ಪಲ್ಯ

ಬದನೆ (ಹಸಿರು ಉದ್ದದ್ದು) 2

ಆಲೂ ದೊಡ್ಡದು 2

ಎಣ್ಣೆ 3 ಚಮಚ

ಸಾಸಿವೆ 1/4 ಚಮಚ

ಹಸಿರು ಮೆಣಸಿನಕಾಯಿ 2

ಕರಿಬೇವು

ಅರಸಿನ 1/4 ಚಮಚ

ಮೆಣಸಿನ ಹುಡಿ (ಬ್ಯಾಡಗಿ/ಕಾಶ್ಮೀರಿ) 1/2 ಚಮಚ

ಹುಣಿಸೆ ರಸ 1/2 ಚಮಚ

ತುಪ್ಪ 1/2 ಚಮಚ

ವಾಂಗೀಬಾತ್ ಪುಡಿ 1 ಚಮಚ (ಎಂಟಿಅರ್)

ತೆಂಗಿನತುರಿ 2 ಚಮಚ

ರುಚಿಗೆ ತಕ್ಕಷ್ಟು ಉಪ್ಪು

ಮೊದಲಿಗೆ ಆಲೂ ಮತ್ತು ಬದನೆಕಾಯಿಯನ್ನು ಹೆಚ್ಚಿಕ್ಕೊಳ್ಳಿ (1 ಇಂಚು ಉದ್ದ), ಬದನೆಕಾಯಿಯನ್ನು ಮಾತ್ರ ನೀರಿನಲ್ಲಿ ಹಾಕಿಡಿ, ಬಾಣಲೆಯಲ್ಲಿ  ಎಣ್ಣೆ, ತುಪ್ಪ ಹಾಕಿ, ಬಿಸಿ ಆದ ನಂತರ ಸಾಸಿವೆ, ಹಸಿಮಣಸು, ಕರಿಬೇವು, ನೀರಿನಲ್ಲಿ ಹಾಕಿಟ್ಟಿದ್ದ ಬದನೆಕಾಯಿ ತೆಗೆದು ಹಾಕಿ 1 ನಿಮಿಷ ಕಲೆಸಿ, ನಂತರ ಆಲೂ ಹಾಕಿ ಕಲೆಸಿ, ಅಗತ್ಯವಿದ್ದಷ್ಟು ಉಪ್ಪು, ಅರಸಿನ ಹಾಕಿ ಮುಚ್ಚಿಡಿ, ಮುಕ್ಕಾಲು ಭಾಗ ಬೆಂದ ನಂತರ ಇದಕ್ಕೆ ಮೆಣಸಿನ ಹುಡಿ, ಹುಣಿಸೆ ರಸ, ವಾಂಗೀಬಾತ್ ಪುಡಿ ಹಾಕಿ ನಿಧಾನವಾಗಿ ಕಲೆಸಿ, 2 ನಿಮಿಷ ಆದ ನಂತರ ತೆಂಗಿನತುರಿ ಹಾಕಿ ಕಲೆಸಿ ಇಳಿಸಿ (ಮೀಡಿಯಂ ಫ್ಲೇಮ್ ನಲ್ಲಿ ಮಾಡಬೇಕು) ಇದಕ್ಕೆ ನೀರಿನ ಅಗತ್ಯವಿಲ್ಲ.

ಇದು ಚಪಾತಿಗೆ ಮತ್ತು ಉದುರುದುರಾದ ಅನ್ನಕ್ಕೆ ಕಲಸಿ ತಿನ್ನಲು  ಭಾರೀ ರುಚಿ.

ಟೊಮೆಟೊ ಗೊಜ್ಜು

ಟೊಮೆಟೊ 2

ಈರುಳ್ಳಿ 2

ಮೆಣಸಿನಕಾಯಿ 2(ಸಣ್ಣಗೆ ಹೆಚ್ಚಿದ್ದು)

ಅರಸಿನ 1/4 ಚಮಚ

ಮೆಣಸಿನ ಹುಡಿ 1/2 ಚಮಚ

ಎಣ್ಣೆ 3 ಚಮಚ

ಸಾಸಿವೆ 1/4 ಚಮಚ

ಕರಿಬೇವು (ಬೇಕಾದರೆ)

ಬಾಣಲೆಯಲ್ಲಿ ಎಣ್ಣೆ ಕಾದ ನಂತರ ಸಾಸಿವೆ, ಹಸಿಮೆಣಸು, ಈರುಳ್ಳಿ ಸಣ್ಣಗೆ ಹೆಚ್ಚಿದ್ದು ಹಾಕಿ ಫ್ರೈ ಮಾಡಿ, ನಂತರ ಕರಿಬೇವು, ಸಣ್ಣಗೆ ಹೆಚ್ಚಿದ ಟೊಮೆಟೊ ಹಾಕಿ ಕಲೆಸಿ, ಇದಕ್ಕೆ ಉಪ್ಪು, ಅರಸಿನ, ಮೆಣಸಿನ ಹುಡಿ ಹಾಕಿ 3 ನಿಮಿಷ ಮುಚ್ಚಿಡಿ. (ಇದಕ್ಕೆ ನೀರಿನ ಅಗತ್ಯವಿಲ್ಲ). ೫ ನಿಮಿಷ ಸಾಕು ಈ ಗೊಜ್ಜು ತಯಾರಿಸಲು,

ಇದು ಚಪಾತಿ, ಪೂರಿಗೆ ಚನ್ನಾಗಿರುತ್ತದೆ, ಉದುರುದುರಾದ  ಬಿಸಿ ಅನ್ನಕ್ಕೆ ಚೂರು ತುಪ್ಪ ಹಾಕಿ ತಿನ್ನಲು ರುಚಿ, ರುಚಿ. ಕ್ವಿಕ್ ಆಂಡ್ ಸಿಂಪಲ್.

ಖಾರ ಪೊಂಗಲ್, ಮೆಂತ್ಯೆ ಗೊಜ್ಜು

ಖಾರ ಪೊಂಗಲ್

ಅಕ್ಕಿ 1 ಕಪ್

ಹೆಸರುಬೇಳೆ 1/2 ಕಪ್

ಗೋಡಂಬಿ 2 ಚಮಚ

ಕಾಳುಮೆಣಸು 1 ಚಮಚ

ಜೀರಿಗೆ 1/2 ಚಮಚ

ಶುಂಠಿ 1 ಚಮಚ (ಸಣ್ಣಗೆ ಹೆಚ್ಚಿ ಜಜ್ಜಿಕೊಳ್ಳಿ)

ಕರಿಬೇವು ಸ್ವಲ್ಪ

ತುಪ್ಪ 3 ಚಮಚ

ನೀರು 3-1/2 ಕಪ್

ಉಪ್ಪು –ರುಚಿಗೆ ತಕ್ಕಂತೆ

ಮೊದಲಿಗೆ ಹೆಸರುಬೇಳೆಯನ್ನು ಸ್ವಲ್ಪ ಹುರಿದುಕೊಳ್ಳಿ, ಇದು ತಣಿದ ನಂತರ ಅಕ್ಕಿ, ಬೇಳೆಯನ್ನು ತೊಳೆದು  ಇಟ್ಟು ಕೊಳ್ಳಿ. ಒಂದು ಕುಕ್ಕರ್ ತೆಗೆದುಕೊಂಡು ತುಪ್ಪ ಹಾಕಿ ಗೋಡಂಬಿ ಹುರಿದು ತೆಗೆದಿಟ್ಟುಕೊಳ್ಳಿ. ಈಗ ಇದೇ ತುಪ್ಪಕ್ಕೆ ಕಾಳುಮೆಣಸು, ಜೀರಿಗೆ, ಶುಂಠಿ ಜಜ್ಜಿದ್ದು, ಕರಿಬೇವು ಒಂದೊಂದಾಗಿ ಹಾಕಿ ಹುರಿಯಿರಿ. ಮತ್ತೆ ಅಕ್ಕಿ, ಬೇಳೆಯನ್ನು ಕುಕ್ಕರಿಗೆ ಹಾಕಿ, 3 ½ ಕಪ್ ನೀರು, ಉಪ್ಪು ಹಾಕಿ ಕಲಸಿ ಮುಚ್ಚಳ ಮುಚ್ಚಿ, 2 ವಿಸಲ್ ಬರುವ ತನಕ ಬೇಯಿಸಿ. ಪ್ರೆಶರ್ ಇಳಿದ ನಂತರ ಗೋಡಂಬಿ ಹಾಕಿ ನಿಧಾನವಾಗಿ ಕಲಸಿ. ಬಿಸಿ ಬಿಸಿಯಾಗಿ ತೆಂಗಿನಕಾಯಿ ಚಟ್ನಿಯ ಜೊತೆ ತಿನ್ನಲು ರುಚಿ.

ಮೆಂತ್ಯೆ ಗೊಜ್ಜು

ಹುರಿಗಡಲೆ ಪುಡಿ 2 ಚಮಚ

ಮೆಂತ್ಯೆ 1 ಚಮಚ

ತುಪ್ಪ 1-1/2 ಚಮಚ

ಸಾಸಿವೆ 1/4 ಚಮಚ

ಹಸಿಮೆಣಸು 2

ಸಾರಿನ ಪುಡಿ 1 ಚಮಚ

ಬೆಲ್ಲ 1/೪ ಚಮಚ

ಕರಿಬೇವು

ಹುಣಿಸೆ ರಸ 4 ಚಮಚ

ಉಪ್ಪು ರುಚಿಗೆ ತಕ್ಕಷ್ಟು

ಮೊದಲಿಗೆ ಬಾಣಲೆಯಲ್ಲಿ ತುಪ್ಪ ಬಿಸಿಮಾಡಿ, ಮತ್ತೆ  ಸಾಸಿವೆ ಹಾಕಿ ಸಿಡಿದ ನಂತರ ಮೆಂತ್ಯೆ ಹಾಕಿ, ಹಸಿಮೆಣಸು ಉದ್ದಕ್ಕೆ ಹೆಚ್ಚಿ ಹಾಕಿ, ಕರಿಬೇವು, ಹುಣಸೆ ರಸ ಹಾಕಿ ಕಲಸಿ, ಮತ್ತೆ ಬೆಲ್ಲ ಪುಡಿ, ಉಪ್ಪು, MTR ಸಾರಿನ ಪುಡಿ ಹಾಕಿ ಕಲಸಿ. ಈಗ ಅರ್ಧ ಕಪ್ ನೀರು ಮತ್ತು ಹುರಿಗಡಲೆ ಪುಡಿ ಹಾಕಿ 2 ನಿಮಿಷ ಕುದಿಸಿ. ಮೆಂತ್ಯೆ ಗೊಜ್ಜು ಸ್ವಲ್ಪ ಗಟ್ಟಿಯಾಗಿ ಇರಬೇಕು (ತುಂಬಾ ಗಟ್ಟಿ ಅನಿಸಿದರೆ ಸ್ವಲ್ಪ ನೀರು ಹಾಕಿ). ಬಿಸಿ ಅನ್ನದೊಂದಿಗೆ ತಿನ್ನಲು ಭಾರೀ ರುಚಿ. ಅನ್ನಕ್ಕೆ ಒಂದು ಚಮಚ ತುಪ್ಪ ಹಾಕಿದರೆ...ವಾಹ್!

ಸಂಕ್ರಾಂತಿ ಸ್ಪೆಶಲ್

ಜನವರಿ ೧೪ ರಂದು ಮಕರ ಸಂಕ್ರಾಂತಿ. ದೇಶದಾದ್ಯಂತ ವಿವಿಧ ರೀತಿಯಲ್ಲಿ ಆಚರಿಸುವ ವಿಶೇಷ ಹಬ್ಬ. ಕರ್ನಾಟಕದಲ್ಲಿ ಎಲ್ಲಾ ಕಡೆ ಅತ್ಯಂತ ಸಡಗರದಿಂದ ಈ ಹಬ್ಬವನ್ನು ಆಚರಿಸುತ್ತಾರೆ. ಸ್ನೇಹಿತರಿಗೆ, ನೆರೆಯವರಿಗೆ ಎಳ್ಳು ಬೆಲ್ಲ ಬೀರಿ ಹಬ್ಬದ ಶುಭಾಶಯ ತಿಳಿಸುವುದು ವಾಡಿಕೆ.ಎಳ್ಳು ಬೆಲ್ಲ ತಿಂದು ನೀವೆಲ್ಲರೂ ಒಳ್ಳೇದನ್ನೇ ಮಾತನಾಡಿ.

ಈ ಹಬ್ಬಕ್ಕೋಸ್ಕರ ಎರಡು ತಿಂಡಿಗಳನ್ನು ಮಾಡುವ ವಿಧಾನ ಇಲ್ಲಿದೆ....

ಪೊಂಗಲ್

ಬೇಕಾದ ಸಾಮಗ್ರಿಗಳು

ಅಕ್ಕಿ 1 ಕಪ್
ಬೆಲ್ಲದ ಹುಡಿ  1-1/4 ಕಪ್
ಹೆಸರು ಬೇಳೆ 1/2 ಕಪ್
ತುಪ್ಪ 1/4 ಕಪ್
ಒಣ ದ್ರಾಕ್ಷಿ -2 ಚಮಚ
ಗೋಡಂಬಿ - 3 ಚಮಚ
ಏಲಕ್ಕಿ ಪುಡಿ -ಸ್ವಲ್ಪ
ಕೊಬ್ಬರಿ ಸಣ್ಣಕ್ಕೆ ಕಟ್ ಮಾಡಿದ ತುಂಡುಗಳು ೪ ಚಮಚ

ಮಾಡುವ ವಿಧಾನ: ಮೊದಲಿಗೆ ಅಕ್ಕಿ, ಬೇಳೆಯನ್ನು 2 ನಿಮಿಷ  ಬಾಣಲೆಯಲ್ಲಿ ಹುರಿಯಿರಿ (ಎಣ್ಣೆ ಹಾಕದೆ). ಇದು ತಣಿದ ನಂತರ ಎರಡು ಸಲ ತೊಳೆಯಿರಿ,
ಮತ್ತೆ ಕುಕ್ಕರಿನಲ್ಲಿ  ಎರಡನ್ನೂ ಜೊತೆಗೆ ಹಾಕಿ  4 1/2 ಕಪ್ ನೀರು ಹಾಕಿ 3 ವಿಸಲ್ ಬಂದ ನಂತರ ಸ್ಟೌವ್ ಆಫ್ ಮಾಡಿ. ಈಗ ದ್ರಾಕ್ಷಿ, ಗೋಡಂಬಿ, ಕೊಬ್ಬರಿ ಸ್ವಲ್ಪ ತುಪ್ಪದಲ್ಲಿ ಕರಿದು ಇಟ್ಟುಕೊಳ್ಳಿ.
ಇನ್ನೊಂದು ಪಾತ್ರೆಯಲ್ಲಿ ಪುಡಿ ಮಾಡಿದ ಬೆಲ್ಲ ಹಾಕಿ, ಅದಕ್ಕೆ 1 ಕಪ್ ನೀರು ಹಾಕಿ ಬಿಸಿಮಾಡಿ ಕರಗಿಸಿ, ನಂತರ ಸೋಸಿ. ಈಗ ಕರಗಿಸಿದ ಬೆಲ್ಲವನ್ನು ಪಾತ್ರೆಗೆ ಹಾಕಿ ಕುದಿಸಿ. ಒಂದು ಎಳೆ ಪಾಕ ಬಂದ ನಂತರ (ನೂಲು ತರಹ ಎಳೆ ಬರಬೇಕು), ಬೇಯಿಸಿಟ್ಟ ಅಕ್ಕಿ, ಬೇಳೆಯನ್ನು ಪಾಕಕ್ಕೆ ಹಾಕಿ ಕಲಸಿ, ಇನ್ನು, ತುಪ್ಪ, ಕರಿದಿಟ್ಟುಕೊಂಡ ಕೊಬ್ಬರಿ, ಗೋಡಂಬಿ, ದ್ರಾಕ್ಷಿ ಹಾಕಿ ಪುನ: ಚೆನ್ನಾಗಿ ಕಲಸಿ, ಇದರೊಟ್ಟಿಗೆ ಏಲಕ್ಕಿ ಪುಡಿ ಸಹ ಹಾಕಿ. ಸಿಹಿ ಸಿಹಿಯಾದ ಸ್ವಾದಿಷ್ಟ ಪೊಂಗಲ್ ರೆಡಿ. ಬಿಸಿಬಿಸಿ ತಿಂದರೆ ರುಚಿ ಜಾಸ್ತಿ.


ಬೆಂಗಳೂರು ಆಂಬೊಡೆ

ಕಡಲೆಬೇಳೆ 1 ಕಪ್
ಈರುಳ್ಳಿ 2
ಹಸಿಮೆಣಸು 3 ಅಥವಾ 4
ಕರಿಬೇವು 3 ಚಮಚ (ಸಣ್ಣಗೆ ಹೆಚ್ಚಿದ್ದು)
ಪುದಿನ 3 ಚಮಚ (ಸಣ್ಣಗೆ ಹೆಚ್ಚಿದ್ದು)
ಶುಂಠಿ 1 ಇಂಚು
(ಬೇಕಾದರೆ 2 ಬೆಳ್ಳುಳ್ಳಿ ಎಸಳು)
 ಕಟ್ ಮಾಡಿದ ಹಸಿಕೊಬ್ಬರಿ 2 ಚಮಚ
ಇಂಗು
ಉಪ್ಪು

ಮಾಡುವ ವಿಧಾನ: ಕಡಲೆಬೇಳೆ 2 ಗಂಟೆ ನೆನೆಸಿಡಿ. ಮೊದಲಿಗೆ ಶುಂಠಿ, ಹಸಿಮೆಣಸು (ಬೇಕಾದರೆ 2 ಬೆಳ್ಳುಳ್ಳಿ ಎಸಳು) ಜೊತೆಗೆ ರುಬ್ಬಿಕೊಳ್ಳಿ (ತುಂಬಾ ಪೇಸ್ಟ್ ಆಗುವುದು ಬೇಡ)
ಅದನ್ನು ತೆಗೆದು ಬೌಲ್ ಗೆ ಹಾಕಿಕೊಳ್ಳಿ. ನಂತರ ಕಡಲೆಬೇಳೆಯನ್ನು ನೀರಿನಿಂದ ತೆಗೆದು ತರಿತರಿಯಾಗಿ ರುಬ್ಬಿ ತೆಗೆದಿಟ್ಟುಕ್ಕೊಳ್ಳಿ. ಈ ತರಿಯೊಟ್ಟಿಗೆ ಶುಂಠಿಯ ಪೇಸ್ಟ್ ಹಾಕಿ,
ಇದರೊಟ್ಟಿಗೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ತೆಂಗಿನಕಾಯಿ, ಕರಿಬೇವು, ಪುದಿನ, ಉಪ್ಪು, ಇಂಗು ಎಲ್ಲವನ್ನು ಹಾಕಿ ಚೆನ್ನಾಗಿ ಕಲಸಿ ಇಟ್ಟುಕೊಳ್ಳಿ (ನೀರು ಹಾಕಬೇಡಿ). ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿಮಾಡಿ (ಮೀಡಿಯಂ flame). ಈಗ ಕಲಸಿ ಇಟ್ಟು ಕೊಂಡ ಆಂಬೊಡೆ ಮಿಕ್ಸ್ ನ್ನು ಸಣ್ಣ ನಿಂಬೆ ಹಣ್ಣಿನ ಗಾತ್ರದಲ್ಲಿ ತೆಗೆದುಕೊಂಡು ಅಂಗೈಯಲ್ಲಿ ತಟ್ಟಿ ಕಾದ ಎಣ್ಣೆಗೆ ಹಾಕಿ ಕರಿಯಿರಿ (ಕಂದು ಬಣ್ಣಕ್ಕೆ ತಿರುಗುವ ತನಕ). ಎಣ್ಣೆಯಿಂದ ತೆಗೆದು ಸ್ವಲ್ಪ ತಣಿದ ನಂತರ ಗರಿಗರಿಯಾದ ಆಂಬೊಡೆ ನೀವೂ ತಿನ್ನಿ, ಪ್ರಿಯರಿಗೂ ತಿನ್ನಿಸಿ. ಚಳಿಗಾಲದಲ್ಲಿ ಕಾಫಿ ಯಾ ..... ಜೊತೆ ತಿನ್ನಲು ಬಹಳ ಖುಶಿ.
(ಕಡಲೆಬೇಳೆ ವಾಯುವಾದ ಕಾರಣ  ಬೆಳ್ಳುಳ್ಳಿ ಹಾಕಿ ಮಾಡಿದರೆ ಆರೋಗ್ಯಕ್ಕೆ ಒಳ್ಳೆಯದು. ಪುದಿನ ಸೊಪ್ಪಿನ ಬದಲು ಸಬ್ಬಕ್ಕಿ ಸೊಪ್ಪು ಕೂಡಾ ಹಾಕಬಹುದು)

ಸಮಸ್ತ ಕನಡಿಗರಿಗೆ ನಮಸ್ಕಾರ
ನಾಡಿನಿಂದ ಬಲು ದೂರ ಇರುವ ವಿಶ್ವ ಕನ್ನಡಿಗನ ಹೃದಯವನ್ನು ಮುಟ್ಟುವ ಒಂದು ಪ್ರಯತ್ನ ಇದು.
ಹೃದಯಕ್ಕೆ ಉದರವೇ ನೇರ ದಾರಿಯಲ್ಲವೆ? ಅಂತೆಯೇ ನಾನು ಆಗಾಗ  ನಾಡಿನ ತಿಂಡಿ, ತಿನಸುಗಳನ್ನು ಮಾಡುವ ವಿಧಾನಗಳನ್ನು ನಿಮಗೆ ತಿಳಿಯ ಪಡಿಸಲಿದ್ದೇನೆ.
ನಿಮಗೆ ಇಷ್ಟವಾದರೆ, ದಯವಿಟ್ಟು ಮಾಡಿ ನಿಮ್ಮವರಿಗೆ, ಸ್ನೇಹಿತರಿಗೆ ತಿನ್ನಿಸಿ ಧನ್ಯವಾಗಿರಿ.
ಜನ ತಿಂದು ಹೊಗಳಿದರೆ ಸಿಗುವ ಸಂತೋಷ ತಿಂದದ್ದಕ್ಕಿಂತಲೂ ಜಾಸ್ತಿ ಅಲ್ಲವೇ?
ಹಾಗೇ, ಕೆಲವು ಟಿಪ್ಸ್ ಕೂಡಾ ಇಲ್ಲಿ ಸಿಗುತ್ತವೆ.
ನಿಮ್ಮ ಅನಿಸಿಕೆಗಳನ್ನು ಬರೆಯಿರಿ ...
ಸದ್ಯದಲ್ಲೇ ತಿಂಡಿಗಳೊಂದಿಗೆ ಬರಲಿದ್ದೇನೆ... ಜಮುನ